这两天，好多朋友先后来电表示对我五星体育继续转播英超联赛的欣慰之情，其中也包括两周前那位专程把我从办公室“拖”出去“拷问”的友人。
友人：娄啊，太好了，太好了，五星体育格记台型轧足了！！！
我：呵呵，还好伐。我弗是上趟就帮侬讲覅急，等等看，到辰光侬就晓得来！
友人：个么侬电视台哪能帮人家谈下来呃啦？好讲一眼拨我听听伐啦？
我：喂，老兄啊，又弗是我去谈呃咯，我哪能晓得里厢有眼啥故事？对伐？现在领导宣布谈下来了，个么我就开始准备转播。领导假使讲谈弗下来，个么我就继续回去困觉。。。
友人：我看网廊厢新闻讲电视台现在谈下来呃只有一年呃版权，个么明年哪能办啦？
我：哈哈哈，朋友啊，侬真是心向好得来。。。今年还呒没过光侬已经了嗨想明年啦？？？我上趟帮侬讲呃忘记脱了？介许多年数阿拉帮版权商侪是一年一年签呃！真哦，每年斗智斗勇斗脑细胞。。。凭良心讲，啥人弗希望一枪头多签脱两年，但是人家开出来呃价钿多少辣手？绝对像抢钞票哦，侬晓得伐？否则哪能会得弄成现在迭副腔调，每年一到7、8月份就要开始帮伊拉搞脑子！
友人：我记得侬上趟讲英超转播最根本呃问题是版权成本太高，我后头上网查了查看到讲版权商帮英超续签6年，价钿超过10亿人民币！真哦假哦？
我：具体多少价钿我哪能晓得？迭个叫“商业机密”！！！懂伐？？？但是呢，看看伊拉现在迭副急吼啦吼寻电视台谈价钿、寻网站开天价、寻观众收费呃腔势，估计英超方面斩伊拉是斩了蛮凶哦！不过，有句讲句，英超公司“骗”钞票呃本事是蛮吓人哦。侬想想看，英超版权蹲了美国居然卖到3年2.5亿美金，蹲了香港新加坡侪要卖到2亿美金，迭能算算卖到中国呃价钿还是便宜哦。。。
友人：啊？还算是便宜哦？便宜到呒没人敢接手？
我：哈哈哈，接手还是有人接哦。。。侬呒没看到人家网站一枪头1100万美金捺一年呃版权拗下来啦？多少大呃手笔？？？所以侬前头讲阿拉五星体育轧台型，有啥断命呃台型？弗一样哦，阿哥！人家背后头有风投，阿拉有弗啦？要么热疥头有两只？覅讲阿拉电视台捺弗出介许多钞票，就算捺得出，侬想想看叫湖南卫视弗做《爸爸去哪儿》，浙江卫视弗做《中国好声音》，调枪头去买英超，可能伐？我弗是瞎讲啥，台长签字呃辰光绝对浑身发抖！！！
友人：个么照侬迭能介讲明年7、8月份英超版权呃“连续剧”又要再来了咯？
我：哈哈哈，绝对哦！！！侬晓得伐，我蹲了办公室里老早就讲过了：斗争是长期的，艰苦的，卓绝的。。。唉，想想人家版权商蛮作孽哦，拨英国人斩得来血淋嗒滴，回过来只好对牢自家同胞血盆大口，眼乌珠血血红。。。
友人大笑：坏是侬坏！
（声明：本文仅代表作者观点，不代表新浪网立场。）
